"Барилга, орон сууц-2010" үзэсгэлэн яармаг ирэх сарын 3-6-ны өдрүүдэд зохион байгуулагдах гэж байна.

Жил бүр зохион байгуулагддаг уг арга хэмжээг ЗТБХБЯ, Монголын барилгын холбоо, ҮХАҮТ, Барилгын зөвлөл зэрэг нэлээд хэдэн байгууллага хамтран зохион байгуулах юм.
Энэхүү үзэсгэлэнгээр шинэ орон сууцны талаарх дэлгэрэнгүй мэдээлэл, барилгын материалын үнэ болон шинэ техник технологийн талаарх мэдээллийг өгөх аж.

Хямрал нүүрлэсэн он жилүүдийн хамгийн хүчтэй цохилт барилгын салбарт бууснаас 396 барилга байгууламж зогсож, 29700 айл өрхийн оруулсан хөрөнгө оруулалт үнэ цэнээ алдсан гэсэн тооцоог мэргэжлийн байгууллагууд гаргажээ. Ноднин жилийн эхний таван сард 45 барилга байгууламж ашиглалтад өгч, 2432 айл орон сууцанд орсон байна.  Харин энэ оны таван сарын байдлаар 52 барилга ашиглалтад орж, 3658 айл өрх орон сууцтай болсон нь барилгын салбарын хурд жаахан ч болов нэмэгдээ юү гэсэн бодол төрүүлнэ. Гэхдээ орон сууцтай болсон айл өрхийн 1080 нь ахмад дайчид, 2000 орчим нь төрийн албан хаагч гээд бодохоор хөлс хөдөлмөрөөрөө орон сууцтай болсон айл өрхийн тоо зургааны нэг хувьтай л дүйж байгаа юм. Тэдгээрийн олонх нь гадаадаас хөрөнгө оруулалттай байдгийг бас нэмж хэлэх нь зүйтэй байх. Өөрөөр хэлбэл хэн нэг нь гадаадын аль нэг улс оронд ажиллаж амьдардаг бөгөөд тэндээсээ хэд гурван ам.доллар илүүчилж гэмээнэ орон сууцанд ордог гэдгийг олон жилийн туршлага баталж байгаа. Тэгэхээр монголчууд бид өөрсдийн хүчээр хагас нүүдэлчин амьдралаасаа салах, ариун цагаан хөдөлмөрийн хөлсөөрөө орон сууцтай болно гэдэг харганы ноос түүж гүү худалдан авах үлгэртэй л ижилхэн сонстоно.

Гэр хорооллыг барилгажуулах төсөл хоёр жилийн өмнө батлагдсан хэдий ч өнөөг хүртэл дорвитой хийгдсэн ажил ховор байна. Мөн газрыг байраар солих, түүнтэй холбогдож гарч ирэх харилцааг зохицуулах хууль эрхзүйн орчин үгүйлэгдэж байгаа юм. Одоогийн байдлаар Зуун айл дахь VII хороолол, “Нарантуул” захын хойд талын гэр хорооллыг буулгаж орон сууц барьж байна. Ингэхдээ тухайн компаниуд иргэдтэй тохиролцож газрын оронд байр өгөхөөр болжээ. Цаашид Зурагт, Гандан зэрэг нийслэлийн төв, дэд бүтцэд ойрхон гэр хорооллын иргэд газраа байраар солих хүлээлттэй байгаа аж.

Энэ талаар Зам тээвэр, барилга хот байгуулалтын яамны холбогдох хүмүүсээс тодрууллаа.

Газрыг байраар солих харилцааг зохицуулах хуулийг боловсруулж байна
(Хот байгуулалт, газрын харилцааны бодлогын газрын ахлах мэргэжилтэн н.Дондогмаа)

-Гэр хорооллыг барилгажуулах төслийн ажлын явц хэр байна вэ. Хаана барилга баригдаж эхэлсэн бэ?
-Аж ахуйн нэгжүүд төслүүдийг тус тусад нь хэрэгжүүлж байгаа. Эдгээрийн тайланг нэгтгээгүй болохоор төслийн явц, үр дүнг хэлэх боломжгүй байна. Төсөл хариуцаж байгаа газруудтай нэг бүрчлэн уулзвал ажлын явцын талаар мэдээлэлтэй болж чадах юм. Ер нь VII, XIV хороололд барилгын ажил эхэлсэн байгаа.